“Amadísima Luisa miña: vou morrer, pero vou morrer como morren os valentes”. O xeneral José María Torrijos (1791-1831) despedíase con estas palabras por carta da súa muller, Luisa Sáenz de Viniegra, xusto antes do seu fusilamento, ordeado por Fernando VII, un 11 de decembro de 1831 nas praias de Málaga.
Coa derradeira epístola deste militar (de sona internacional e amigo do marqués de La Fayette) comezará a lectura dramatizada que a actriz Lucía Álvarez, natural de Mouruás (San Xoán de Río), realizará o vindeiro 5 de setembro ás 19h. no Auditorio do Museo do Prado en Madrid.
Este acto, que será presentado por Javier Barón, comisario da exposición, enmárcase na clausura da exposición sobre o cadro “Fusialmento de Torrijos e os seus compañeiros nas praias de Málaga” (1888) de Antonio Gisbert (1834-1901). Unha das singularidades desta obra é que “é a única pintura de historia que se encargou polo Estado con destino ao Prado, denominado Museo Nacional de Pintura e Escultura dende o inicio do Sexenio Revolucionario”, segundo destaca a propia pinacoteca madrileña.
Este óleo inspírase no xa citado feito histórico, que tivo unha importante repercusión tanto no mundo da arte como da literatura, inspirando a diferentes autores. A partir dos seus escritos, tanto en verso como en prosa, Lucía Álvarez irá establecendo un diálogo arredor da figura de Torrijos recordando, en primeiro lugar, unha carta do tenente británico Robert Boyd (con quen o xeneral español combateu pola liberdade en Grecia), na que lle comunicaba a súa familia que o ían matar.
“Será unha lectura dramatizada dunha hora de duración con textos de diferentes escritores como José de Espronceda, Enrique Gil y Carrasco, Federico García Lorca, Ramón Gómez de la Serna, Antonio Machado, Juan Marsé, Rafael Chirbes, Javier Marías ou Thomas Carlyle, entre outros. Hai algúns textos que son novelados, outros son declaracións e hai tamén catro poemas”, adianta Lucía Álvarez.
Entre eles figura o “Romance a la muerte de Torrijos” de Federico García Lorca incluído no seu drama “Mariana Pineda” (1927), unha figura histórica que esta actriz interpretaba hai apenas un mes sobre o escenario do auditorio de Trives en “Mariana”, dirixida por David Ojeda. Neste poema, Lorca enxalza a figura do xeneral e relata como foi asasinado, en concreto nos versos:
“Muy de noche lo mataron
con toda su compañía.
Caballero entre los duques.
corazón de plata fina.
El viente mueve la mar
y los barcos se retiran
con los remos presurosos
y las velas extendidas.
Entre el ruido de las olas
sonó la fusilería,
y muerto quedó en la arena,
sangrando por tres heridas,
el valiente caballero,
con toda su compañía.
La muerte, con ser la muerte,
no deshojó su sonrisa”.
Ademais Lucía Álvarez dará lectura a un texto de José Ramón Fernández, autor da citada obra teatral “Mariana”, no que esta heroína se refire directamente ao militar. “Me llamo Mariana Pineda Muñoz. Me van a matar el 26 de mayo de 1831. Por apoyar a los liberales. A los partidarios del general Torrijos (…) Estaré muerta y seré canciones cuando el general Torrijos llegue a las playas de Málaga, el 2 de diciembre. Y cuando lo maten en la playa de San Andrés, junto a cuarenta y ocho de sus compañeros. Sin un juicio. Sin nada que decir. Lo dirán las olas de Málaga y lo dirán los poetas de otros siglos. Algunos momentos de nuestra Historia se han salvado del olvido gracias al Arte“.
E así se recordará na voz e na interpretación de Lucía Álvarez o vindeiro 5 de setembro no Prado, xunto a unha proxección deste cadro histórico.
