A actriz Mabel Rivera toma o relevo de Antonio Durán “Morris” e será homenaxeada na vindeira edición do FIC Vía XIV de Verín que se celebrará do 30 de novembro ao 8 de decembro. Así, en torno á figura desta actriz de orixe ferrolá articularase “unha actividade na axenda paralela do festival que incluirá unha charla coa actriz e a proxección dunha selección de curtametraxes nas que ten participado ao longo da súa fecunda carreira”, segundo sinala o director do certame Carlos Montero.
Mabel Rivera posúe unha dilatada traxectoria artística no eido da actuación e dende os anos 70 ten participado en multitude de proxectos teatrais, televisivos e de cinema. Gañadora dun Premio Goya por Mar Adentro no ano 2005, Rivera é un rostro ben coñecido para os telespectadores galegos pola súa participación na célebre serie Pratos Combinados, que estivo en antena durante oito anos na Televisión de Galicia, ou xa máis recentemente Pazo de Familia, ademais de en numerosos filmes a nivel nacional.