Entre os puntos que se someterán a votación na sesión plenaria que a Corporación barquense celebrará o vindeiro 10 de xaneiro figura a adhesión do Concello do Barco ao convenio de colaboración subscrito enre a Xunta de Galicia, a Federación Galega de Municipios e Provincias (Fegamp) e as deputacións provinciais en materia de emerxencias e prevención e defensa contra incendios forestais para o desenvolvemento dos Grupos de Emerxencias Supramunicipais (GES).
O GES Valdeorras ten un total de doce prazas, pero nestes momentos só están cubertas dez, tras unha xubilación a finais do 2018 e tamén o feito de que outro dos seus integrantes non pediu a indefinición da súa praza. “Xa se lle pediu que a solicite e, en canto sexa indefinido volverá incorporarse. Calculamos que será en cuestión de dous ou tres meses”, segundo indica o alcalde do Barco, Alfredo García.
A intención do Concello é manter esas doce prazas no GES Valdeorras, de feito, “xa temos previsto sacar a concurso a praza que nos quedaba vacante por xubilación”, confirma o rexedor.
