A Asociación de Veciños/as de Vilachá de Salvadur vén de emitir unha nota de prensa que solicita á “Administración pública máis compromiso coas adegas medievais como elemento patrimonial único na Ribeira Sacra”. Neste senso, dende esta entidade sinalan que “o pasado venres 3 de setembro o Diario Oficial de Galicia publicaba a entrada en vigor do Plan de Acción da Paisaxe da Ribeira Sacra. Este documento recolle itinerarios de interese paisaxístico con valores panorámicos por varios lugares e concellos desta zona. A Asociación de Veciños/as de Vilachá de Salvadur lamenta que, unha vez máis, a Administración non teña en conta a súa parroquia nos plans de promoción da Ribeira Sacra. Dende a asociación reclaman unha maior implicación por parte das entidades públicas para a conservación, mellora e promoción das adegas de Vilachá (A Pobra do Brollón), que foron declaradas BIC e que son un elemento único da frustrada candidatura a Patrimonio da Humanidade polo seu carácter etnográfico”.
Así mesmo, esta asociación asegura que “dende o comezo da candidatura a parroquia de Vilachá de Salvadur aínda non obtivo ningunha axuda nin apoio para a posta en valor tanto do BIC como doutros elementos patrimoniais”. Tamén indica que amosou a súa vontade de colaborar coa Administración, “dende un diálogo construtivo e totalmente desinteresado” e que solicitaron a inclusión na Mesa Interdepartamental da Ribeira Sacra e o Consello de Parroquias, pero non recibiron “resposta de ningunha delas”.
A organización veciñal considera “importante a inclusión destes espazos con alto valor etnográfico nun pacto de promoción dos valores naturais, culturais e patrimoniais da Ribeira Sacra”. Ademais cren “oportuno incluír outros elementos de interese, e que encaixarían coas liñas do citado plan presentado pola Xunta, como son o miradoiro da Capela ou a posta en valor do trazado histórico do Camiño de Inverno, que esta asociación leva reivindicando á espera do ditame final da Dirección Xeral de Patrimonio da Xunta de Galicia”.
Por outra parte, e dentro das posibles liñas de traballo futuro, dende a asociación solicitan “unha mellora da sinalización”. Por este motivo, hai meses pediron “formalmente ao Ministerio (tramitado por medio do Concello da Pobra do Brollón) un sinal na N-120 á altura do desvío á Pobra e Vilachá que aínda non tivo resposta”. Igualmente reclaman “sinais para o xacemento castrexo do Castrelao (que este ano será obxecto de estudo arqueolóxico grazas ao apoio da Deputación de Lugo ao proxecto presentado pola Asociación de Veciños/as de Vilachá) e para Os Conventos”.
Por último, dende a asociación fixeron chegar ao Concello un documento con varias propostas para presentar ante o Consorcio de Turismo da Ribeira Sacra. Este documento inclúe “a reposición do panel panorámico no miradoiro da Capela, a protección dos elementos patrimoniais como as mámoas ou un proxecto de renovación do Museo do Viño”.
