SanidadeÚltima hora

A campaña da gripe iniciarase en Galicia o vindeiro 14 de outubro

A vacinación administrarase durante 11 semanas en arredor de 900 puntos do territorio galego

Imaxe da presentación da campaña en Santiago.

 

Do 14 de outubro ao 27 de decembro desenvolverase a vacinación antigripal 2019 en Galicia. Así o anunciaba este luns 30 de setembro o director xeral de Saúde Pública, Andrés Paz-Ares Rodríguez, na presentación desta campaña. A Consellería de Sanidade ofrecerá a vacinación fronte á gripe de xeito continuado ao longo de 11 semanas (unha máis que na campaña anterior), en arredor de 900 puntos de vacinación de todo o territorio galego.

En total a Consellería de Sanidade adquiriu 615.000 doses de vacinas antigripais (7.000 máis que en 2018), e destinou un orzamento de 3.466.632 €, 1.283.412 € máis que no ano 2018, o que supón un incremento de preto do 59%.

“Só coñecemos, de momento, tres autonomías, ademais da galega, que ofrecerán a vacina tetravalente á poboación en risco entre os 6 meses e os 64 anos: Castela e León, Asturias e Canarias, se ben estas empregarán só a tetravalente de cultivo en ovo”, afirmou Paz-Ares Rodríguez. Galicia é, de momento, a única comunidade que utilizará de forma diferencial a vacina tetravalente celular no grupo de idade con factores de risco de 15 a 64 anos, á que se lle supón unha importante maior eficacia con respecto á citada anteriormente, segundo estudos recentes.

Deste xeito, nesta campaña de 2019 empregaranse 3 tipos de vacinas: a vacina tetravalente de cultivo en ovo, que pode ser utilizada na poboación infantil, con patoloxía de base, de 6 meses de idade ata os 14 anos; a vacina tetravalente de cultivo celular, que se empregará por primeira vez para as persoas con factores de risco de 15 a 64 anos, e tamén está indicada para embarazadas; e a vacina trivalente adxuvada, para todas as persoas de 65 anos ou máis ingresados en residencias ou non e que se corresponde co grupo de persoas con maior risco de complicacións. Esta ampliación de idade nesta última vacina significa un incremento do 72% de doses con respecto ao ano pasado, segundo Sanidade. Todos os centros disporán dos tres tipos de vacinas.

Do total das 615.000 doses de vacinas antigripais adquiridas, 20.000 corresponden a tetravalente de cultivo en ovo, 165.000 á tetravalente de cultivo celular e 430.000 doses son de vacina trivalente adxuvada (180.000 doses mais que o ano pasado).

Outras das novidades salientables da campaña 2019, en canto á poboación diana, é a inclusión como grupo de risco aos nenos de entres 6 meses de idade que naceran prematuros (con menos de 32 semanas de xestación) e a incorporación explícita das persoas con trastornos da coagulación.

Sanidade mantén a indicación prioritaria desta vacinación no persoal sanitario do Sergas, por segundo ano consecutivo e tras a boa aceptación que tivo esta iniciativa en 2018, ofertando a posibilidade de vacinarse, de forma exclusiva, unha semana antes do comezo da campaña xeral, é dicir, o 7 de outubro. Deste xeito, o persoal pode afrontar o inicio da campaña de vacinación xa protexido fronte á gripe, evitando o risco de transmisión aos seus pacientes. Como novidade, o departamento sanitario amplía esta oferta aos profesionais dos centros hospitalarios privados.

Poboación diana e obxectivos específicos

A vacinación ofértase gratuitamente para as persoas de 60 anos ou máis anos, residente en institucións pechadas de calquera idade, mulleres embarazadas, nenos e adolescentes con tratamentos prolongados de ácido acetilsalicílico (AAS) nenos de 6 meses a 2 anos de idade que naceran prematuros e tamén para aquelas persoas entre 6 meses e 59 anos con factores de risco que os predispoñan a padecer complicacións derivadas da gripe. Ademais, ofértase a persoas que lle poden transmitir a gripe a outras con alto risco de complicacións (entre os que se atopan os traballadores sanitarios) e para persoas que desenvolven servizos esenciais para a comunidade.

A vacina antigripal non só evita casos senón que diminúe a frecuencia de complicacións derivadas desta a enfermidade e o risco de hospitalización e morte relacionada coa gripe.

Os obxectivos específicos son acadar unha cobertura na poboación de 60 a 64 igual ou superior ao 35%; conseguir unha cobertura na poboación de 65 anos ou máis anos igual ou superior ao 65%, acadar unha cobertura igual ou superior ao 50% (10 puntos máis que en 2018) nos traballadores sanitarios do Sergas e igual ou superior ao 55% (15 puntos máis que na pasada campaña) nas mulleres embarazadas.

 

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close