“Comeza o traballo de rúa que pretende poñer o broche a catro anos de traballo”. Con estas palabras aludía o candidato socialista á reelección como alcalde no Barco, Alfredo García, ao inicio da campaña electoral das eleccións municipais do 24 de maio.
Nos vindeiros quince días os socialistas barquenses adicaranse a tres cousas “fundamentalmente: a dicirlle aos barquenses quen somos e que facemos, algo que xa saben, pero tamén a explicarlles que imos facer e a presentarnos, especialmente os novos, os que se incorporan a esta lista para que tamén os coñezan de preto”, adiantaba o cabeza de lista barquense do PSdeG-PSOE.
A súa intención é desenvolver a unha campaña a pé de rúa, mantendo a liña de anos anteriores. “O noso é a rúa, fuximos da parafernalia, despois de 16 anos seguimos traballando coa mesma humildade. Imos de mochila, non imos de corbata”, engadía García.
Ademais de multitude de actos cos veciños, que se desenvolverán en diferentes puntos do municipio, Alfredo García tamén anunciaba a celebración dun mitin central, seguido dunha cea, o sábado 9 de maio ás nove e media da noite no pavillón do Concello. Nel contarase coa presencia do secretario xeral dos socialistas galegos, Xosé Ramón Gómez Besteiro.