Publicidade
PolíticaÚltima hora

A candidata nacionalista María Albert defende no Barco unha “sanidade próxima e de calidade”

Participaba nun mitin na praia fluvial do Malecón, no que estaba acompañada por Alfredo Suárez Canal e Manuel Agra

 

Os once anos de goberno do PP na Xunta foron “demoledores para Valdeorras”. Así de rotunda se manifestaba a concelleira ruesa María Albert, número 3 da candidatura do BNG pola provincia de Ourense ás eleccións galegas, no mitin que a formación nacionalista celebraba na tarde do 7 de xullo na praia fluvial do Malecón do Barco. “Somos periferia para Madrid e para o PP da Xunta da Galicia, a gran xestión de Feijóo non existe para Valdeorras”, incidía.

E, fronte a iso, Albert plantexaba a necesidade de melloras na comarca en tres eidos principais, un deles o económico. “Valdeorras necesita un pulo económico importantísimo”, dicía, apoiado en dous piares: o sector agrario co viño como referencia e o industrial coa lousa. “A Xunta ten que investir economicamente e tamén facer un plan de desenvolvemento para a comarca que se traduza nun plan de futuro que evite que marche a xente nova”.

En segundo lugar, a candidata nacionalista mencionaba ás infraestruturas de comunicacións. “PP e PSOE pásanse a pelota uns a outros, dependendo de quen goberne en Madrid”. Aludía á situación do ferrocarril, “que é traumática en Valdeorras”, e criticaba tamén o último plan da Xunta de transporte por estrada. “Obrígannos a ir a Ourense para moitas xestións que antes podían facerse aquí, pero deixáronnos sen comunicacións”, resaltaba.

 

 

 

Finalmente, Albert defendía a importancia duns servizos sociais públicos, da sanidade e do ensino na comarca. “Queremos unha sanidade próxima e de calidade”. Nesa liña lembraba que o Centro de Saúde da Rúa “está a ser unha batalla continua” e analizaba tamén a situación do Hospital Público de Valdeorras, “que hoxe é un centro de especialidades. Quedan moi poucos servizos e intentarán quitárnolos pouco a pouco”.

Fronte a iso defendeu o proxecto do BNG. “Neste país hai moita xente con ganas de mudar as cousas e isto pode suceder a partir do 12 de xullo, por primeira vez unha muller á fronte da presidencia da Xunta podería darlle un aire novo a este país”, concluía a candidata ruesa.

Suárez Canal: “O cambio galego é posible, pero hai que tomar partido”

A continuación María Albert cedía a palabra a Alfredo Suárez Canal, tamén membro da lista e ex conselleiro de Medio Rural na etapa do bipartito, quen comezaba a súa intervención destacando que estamos ante unha campaña “atípica” na que a cidadanía non está preocupada polas eleccións, senón polo “futuro do seu posto de traballo, pola sanidade, pola educación, polo modelo de produción que se vai incentivar a partir do que sucedeu na pandemia… Pero o que aconteceu coa pandemia estanos obrigando a pensar a Galicia que queremos para os nosos fillos e a diferenciar cales son as cousas secundarias e as prioritarias”.

 

 

Suárez Cabal puxo en cuestión a convocatoria electoral nunha situación sanitaria como a actual, indicando que “quen a fai quere usar a pandemia para permanecer na nova normalidade coa vella rutina”. Aínda así chamou á mobilización o 12X, indicando, “o cambio galego é posible, pero hai que demostrar o heroísmo tomando partido e non quedándose en casa o 12 de xullo. Hai que dar un salto adiante na historia que coloque a unha muller na Xunta de Galicia, preparada e que defenda un proxecto solvente”. E aludía tamén á posibilidade de que “por primeira vez unha valdeorresa dunha forza non dependente de Madrid entre no Parlamento galego”.

Neste mitin tamén participaba Manuel Agra, quen se refería á situación de abandono que sofre Valdeorras en diversos ámbitos e destacaba a importancia de “contar cun partido galego como a mellor forma de defender os intereses da sociedade galega na Xunta e no Parlamento galego”. O acto abríao Vítor Nieves lembrando as medidas de seguridade sanitaria que debían seguir os asistentes.

Fotos: Carlos G. Hervella.

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close