Segue a medrar o número de persoas infectadas polo coronavirus en Galicia. Así se reflexa nos últimos datos feitos públicos polo Ministerio de Sanidade, no que esta comunidade autónoma rexistra 39 casos, se ben nesa estatística non se precisan as cifras por provincia.
Fernando Simón Soria, director do Centro de Coordinación de Alertas e Emerxencias Sanitarias, sinalaba na rolda de prensa que ofrecía esta mañá de 11 de marzo que dos máis de 2.000 casos positivos confirmados en España, arredor do 78% están en catro comunidades autónomas (Madrid, País Vasco, A Rioxa e Cataluña).
“O resto de comunidades supoñen un 22%, pero ningunha comunidade está exenta do risco de transmisión, de que poida haber brotes”, aseguraba Simón, quen ademais recomendaba que “as comunidades con menos casos deberían incrementar a garda”.
Para esta tarde está prevista en Galicia unha rolda de prensa do conselleiro de Sanidade, Jesús Vázquez Almuiña, para informar da situación actual do coronavirus en Galicia.