Dende a praza do Concello partía ás 12h. deste 8 de marzo en Trives a manifestación convocada con motivo do Día Internacional da Muller. O percorrido polas rúas da vila iniciábase tras a lectura dun manifesto por parte da directora do CIM do Concello de Trives e ía encabezada por unha pancarta co lema “Por unha igualdade real”.
Nesta marcha participaban preto dun cento de mulleres e homes da comarca da Terra de Trives (Trives, Manzaneda, San Xoán de Río e Queixa) para defender os dereitos da muller e para festexar todos os logros acadados nestes anos.
A manifestación finalizaba na Sala de Exposicións de Santa Leonor coa danza interpretada por Darija Cz e coa posterior inauguración da exposición fotográfica “Mulleres Trivesas, Mulleres Tigresas”, cuxas protagonistas son as mulleres de Trives, Río e Manzaneda. Todos os asistentes ao acto recibían á entrada da exposición unha pulseira de cor violeta coa inscrición “son valiosa”.
Conferencia e teatro
Este mesmo vernes día 8, ás 20h. no Auditorio Julio Vázquez, o historiador e veciño de Guístolas (San Xoán de Río), Miguel García-Fernández impartirá unha conferencia interesante conferencia sobre “Señoras e campesiñas na Idade Media trivesa. Unha aproximación á nosa historia”.
Trátase dun achegamento a mulleres loitadoras noutras épocas nas terras de Trives, “mulleres que se fixeron oír e valer nun tempo que era casi imposible e así poder tamén analizar os avances e o camiño andado poe estas comparando as distintas datas. Unha importante visión do pasado que nos remarcará a importancia da muller na sociedade desde todos os tempos”, indican dende o Concello trivés.
Ademais dentro do marco do Día da Muller, o domingo 10 de marzo ás 18h. no Auditorio Julio Vázquez terá lugar a representación teatral “Loló e mamá”. Esta peza desde o punto de vista educativo e da igualdade, “aborda, cun equipo artístico 100×100 feminino, dilemas da muller que conviven connosco días a día. As entradas poderán retirarse no auditorio desde media hora antes da función. Ten un aforo limitado e o prezo é de 3€”, matizan dende a organización.
Fotos: Concello da Pobra de Trives
