Con máis de 60 convidados actuará Luar na Lubre no concerto que dará este domingo 19 de agosto na Finca da Casa Reitoral de Esgos, onde tamén haberá espazo para a artesanía, os xogos tradicionais, a olería e a gastronomía.
O último traballo do grupo folk galegp, Ribeira Sacra está centrado na provincia de Ourense e, concretamente, “en toda esa área que a min me toca emocionalmente: Esgos e Xunqueira, onde teño as miñas raíces”, en palabras do líder da agrupación Bieito Romero. A produción está formada por 21 cancións, “das cales catorce son música e as outras son sons da nosa terra que marcan unha identidade”.
O concerto, organizado pola Deputación de Ourense, será o acto principal dunha xornada festiva que incluirá tamén unha mostra de artesanía, xogos tradicionais e postos de olería e gastronomía. As actividades comezarán ás 12. e a actuación está prevista para as 20:30 horas.
A xira musical de Luar na Lubre continuará nos máis de 40 concertos que levarán a Ribeira Sacra por diferentes cidades españolas, pero tamén chegará a Montevideo, Chile, Bos Aires, entre outros lugares que acollerán a súa música. E, dentro desa xira internacional, o grupo de folk terá unha cita en Esgos, na que participarán “máis de 60 artistas convidados como a Coral de Ruada, cerne fundamental para entender a música galega, Félix e Castor Castro, Ses, Nani García, Óscar Rosende, Irene Cerqueiro”, entre outros músicos que compartirán escenario co grupo de música folk.