Na mañá do 10 de febreiro presentábase a designación da Coruña como sede da fase final da Copa do Rei de Baloncesto 2016, que contou coa presenza do secretario xeral para o Deporte, José Ramón Lete Lasa. No acto, Lete destacou “a honra que supón para o deporte galego e para toda Galicia acoller a edición 80 deste torneo”, convidando aos afeccionados a vivir novos momentos históricos, dos que este deporte adoita regalar, máis aínda tendo en conta a boa traxectoria do Río Natura Monbus Obradoiro, o anfitrión galego da proba.
O acto, celebrado no Salón de Plenos do Concello da Coruña baixo a presidencia do alcalde Carlos Negreira, contou así mesmo coa participación do presidente da Deputación, Diego Calvo, do director da Copa do Rei, Gerard Freixa, e do presidente da ACB, Francisco Roca.
Despois de vinte e tres anos desde a última vez na que Galicia foi sede dunha Copa do Rei de Baloncesto –no ano 1993-, Lete Lasa asegurou que a edición de 2016 permitirá amosar de novo a nosa capacidade de organización e a ben coñecida hospitalidade galega.
O secretario xeral para o Deporte rematou agradecendo aos responsables da ACB a súa nova aposta por Galicia, unha comunidade que ocupa o sétimo posto en licencias de baloncesto e que está representada por vinte e un clubs nas ligas de ámbito nacional, cifras que animan á Xunta de Galicia a seguir traballando polo crecemento do baloncesto galego, da man de clubs, federacións, institucións e sociedade.
