Publicidade
EconomíaEconomíaÚltima hora

A crise do coronavirus silencia o son emblemático da sirena de Talleres Meleiro no Barco

Leva funcionando dende 1942 e tan só parou anteriormente en dúas ocasións, e por moi breve espazo de tempo

 

Hai un son que marca de xeito especial a vida diaria no Barco dende hai uns 80 anos. Iso ata hai máis dunha semana, cando Talleres Meleiro paraba a súa actividade polas medidas aplicadas no marco do estado de alarma pola crise do coronavirus e que restrinxían a actividade ás empresas esenciais.

Esta sirena instalábase en torno ao ano 1942 para avisar dos horarios de entrada e de saída dos traballadores desta veterana empresa valdeorresa. “Daquela non había reloxios e en certa maneira prestaba un servizo, de feito os veciños das aldeas en altura dos arredores do Barco escoitábana perfectamente e pedíannos que non a parásemos”, conta Antonio Melo.

Inicialmente eran seis as veces que soaba: ás 7:45h., ás 8h., ás 13h., ás 14:15h., ás 14:30h. e ás 18h. Co tempo, pasaron a ser catro as ocasións nas que se escoitaba: ás 8:30h., ás 13h., ás 14:30h. e ás 18h. E así continuaba ata hoxe.

 

 

Antonio Melo lembra que durante as case oito décadas que leva en funcionamento esta sirena tan só se apagou en dúas ocasións: “cando a empresa se trasladou da nave vella á nova, e foron só dous ou tres días, e noutra ocasión na que se estropeou e cando a se reparou volveu utilizarse”.

Por agora, esta emblemática sirena deixou de marcar as horas no Barco, xa que ao non funcionar Talleres Meleiro, non ten sentido que soe. O regreso deste son será, sen dúbida, un bo sinal e unha volta á normalidade para os barquenses tras semanas de confinamento.

Fotos: Carlos G. Hervella

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close