Esta prestixiosa feira internacional concluirá o 20 de maio na capital británica
Os viños valdeorreses apostan de novo por promocionarse no mercado británico. A Denominación de Orixe Valdeorras conta dende o 18 de maio cun expositor na 35ª edición da “London Wine Fair”, un referente vitivinícola internacional. Este certame, que se prolongará ata o 20 de maio, reúne nesta edición no recinto do “Kensington Olympia” de Londres a máis de 750 expositores chegados de diferentes partes do mundo.
Ademais de profesionais do mundo do viño, polo stand do Consello Regulador valdeorrés nestes días pasaban representantes institucionais como era o caso do embaxador de España no Reino Unido, Federico Trillo-Figueroa, que saudaba e charlaba co presidente do CRDO Valdeorras, José Vicente Solarat.