O presidente da Asociación “Ruta do Viño de Valdeorras”, Joaquín Sánchez, e súa técnica Cristina Núñez, mantiñan unha reunión na mañá deste 22 de outubro co presidente da Deputación de Ourense, Manuel Baltar, no Pazo Provincial.
O encontro servía para acordar a renovación da colaboración da Deputación de Ourense con esta entidade para o ano 2020. Trátase, segundo confirmou o presidente do goberno provincial, “de seguir a promocionar o enoturismo e de estar presente no territorio, nunha comarca esencial para a provincia de Ourense, como é a de Valdeorras, e continuar cooperando e formando parte da “Ruta do Viño de Valdeorras” (como se determinou por acordo plenario da Deputación de Ourense), así como de estar ao carón dos sectores produtivos, sendo o viño e a denominación de orixe Valdeorras, vencellada ao turismo con esta ruta, un exemplo fundamental”.
