Dende os ingredientes e as súas características ata cada detalle do proceso, que remata coa fermentación do mosto. O II Obradoiro de Elaboración de Cervexa Artesá comezaba na mañá do 7 de marzo no Barco cunha explicación teórica de qué é e cómo se fai esta bebida.
E despois da teoría, chegaba a práctica. Os 52 alumnos deste curso, organizados en dous grupos, podían seguir, paso a paso, como se elaboran catro variedades diferentes de cervexas artesás: Summer Ale, Black, Harvest Pale Ale e Oktoberfest.
Este obradoiro, que está tendo como escenario o IES Martaguisela, completarase cunha segunda xornada que está prevista para o 14 de marzo. Nela incluíranse dúas catas de cervexas artesás. Esta acción formativa está promovida dende o Centro de Produtos Tradicionais (CPT) e polo Concello do Barco, no marco do proxecto Eixo Interior.
Texto e fotos: Ángeles Rodríguez