Por fin hai data. Despois de semanas de espera, o vindeiro sábado 16 de xaneiro inaugúrase a tempada invernal de esquí en Manzaneda, “cunha pre-apertura especial durante as dúas primeiras fins de semana”.
Así o vén de comunicar a nova empresa concesionaria da estación, Artabria Turismo, adiantando que o horario de apertura da estación de esquí será de 10 a 17:30 horas, e o horario de venda de forfaits en despachos de billetes de 9:30 a 16 horas ou ata esgotar dispoñibilidade de aforo, fixado en 1.000 o límite de forfaits dadas as limitacións sanitarias fronte ao Covid.
Os días de pre-apertura, para as dúas primeiras semanas de funcionamento, serán o sábado 16, domingo 17, venres 22, sábado 23 e domingo 24 de xaneiro. Estes días só se venderán forfaits de 1 día, con prezo especial para adulto de 20€ e infantil de 15€ (ata 12 anos), exclusivamente en despacho de billetes en efectivo ou tarxeta de crédito, non podéndose adquirir anticipadamente. Dende a estación, puntualizan que “non se venderán billetes de telesilla para uso turístico, non estando permitido subir ás pistas sen forfait. O resto de tarifas e descontos non estarán dispoñibles os dous primeiros fins de semanas de pre-apertura.
Proximamente informarase do calendario de apertura formal da tempada. A apertura de servizos de Manzaneda quedará limitada á estación de esquí, baños públicos e servizo de alugueiro de material de esquí/ snowboard, en horario de 9:30 a 18 horas. O servizo de cafetería non estará dispoñible durante estes dúas primeiras fins de semana, pero dispoñerase de Food Trucks en diferentes puntos da estación.
“Ante a situación sanitaria que estamos a vivir, pídese a colaboración de todo o público, para facer de Manzaneda unha estación segura”, piden dende a estación, asegurando que están a seguir as normas e recomendacións do protocolo Covid unificado da Asociación Turística de Estacións de Esquí e Montaña de España (ATUDEM). “O uso de máscara é obrigatorio en todas as instalacións. En zonas de espera e contornas próximos a remontes deberase manter a distancia interpersoal adecuada”.
Fotos: Carlos G. Hervella.