Foi o primeiro atractivo da renovada Estación de Montaña Manzaneda nesta nova etapa, cultivando un enorme éxito. O bike park abría as súas portas o 29 de maio e, desde entón, non parou de recibir bikers, especialmente as fins de semana, pero tamén ao longo desta, pois agora está aberta os 7 días.
Ante a gran acollida destes circuítos para o público adulto -11 quilómetros habilitados e cinco pistas de diferente nivel-, esta fin de semana Manzaneda estreará unha versión júnior para aqueles nenos que queiran iniciarse nesta modalidade. Así, suma unha oferta máis á súa carteira de actividades, empeñada en ofrecer atractivos e alternativas de lecer para toda a familia.
O Bike Park Júnior dispón de dous circuítos de iniciación aos descensos en bicicleta de montaña. O primeiro deles, de cor verde, conta con ao redor de 180 metros de escasa dificultade, ademais de seis módulos, rollers, pirámides e curvas peraltadas. Con máis extensión, o circuíto azul conta con 260 metros e 9 módulos, rollers, pirámide, pasarela de equilibrio, balancín e dúas pontes. Mesmo se ofrece aos mini bikers unha plataforma de saída con tres ramplas e unha ponte de acceso de case catro metros. Como a seguridade é sempre o máis importante, todos os elementos e infraestruturas destinadas a uso infantil, como pontes ou balancines, levan un tratamento antiescorregadizo para evitar accidentes.
