O Concello San Xoán de Río inauguraba o pasado 15 de xullo a primeira exposición interactiva de gaitas primitivas. Incluía códigos QR para que cada instrumento exposto tivese a súa explicación de forma dixital con audios e videos.
A súa boa acollida e a situación epidiomolóxica actual levaban a que os seus promotores deran un novidoso paso máis. “Debido ao gran éxito da exposición e ao COVID-19, esta mostra, en vez de ter horario de visitas, pasará únicamente a poder ser visitada tras concertar cita no concello de San Xoán de Río. Ademais, todo o mundo terá acceso a exposición virtual nunha páxina web https://www.gaitasprimitivas.com/ “, tal e como anuncian dende o Concello
Así mesmo, unha vez rematada a exposición, quen queira pode enfrentarse ao “Digital Quiz” no que pode comprobar os coñecementos adquiridos. As persoas que superen os 30 puntos recibirán no seu correo electrónico o diploma de ter completado esta exposición asinado por Xosé Miguel Pérez Blecua (alcalde de San Xoán de Río) e Xosé Lois Foxo (director da Escola Provincial de Gaitas da Deputación de Ourense). Ademais as persoas que obteñan as puntuacións mais elevadas recibirán un agasallo relacionado co mundo da gaita.