Ponse en marcha o plan de accións que hai unhas semanas anunciaba a Federación de Comercio de Ourense co fin de pedir a intervención das administracións para “deter a crise profunda que ameaza ao pequeno comercio na provincia de Ourense”, segundo indica a súa presidenta, Beatriz Gómez.
A primeira destas acccións será a convocatoria dun peche de establecementos na tarde do próximo mércores 20 de febreiro, que será seguido dunha concentración no Parque de San Lázaro en Ourense, fronte á Subdelegación do Goberno, onde se dará lectura a un manifesto en defensa dun sector que consideran “clave”, tanto pola “variedade das súas tendas e produtos de calidade, como pola profesionalidade dos que as atenden e pola súa imbricación con outros vectores característicos da sociedade ourensá, como a restauración, a cultura ou o termalismo”.
Para a Federación de Comercio de Ourense a chamada “gran recesión iniciada no 2008 acentuou a crise endémica do pequeno comercio, agravando a súa vulnerabilidade e as ameazas de supervivencia”, tanto para os que dependen directamente desta actividade como para o gran número de empregos que están vinculados con ela”.
Para tratar de darlle a volta á situación actual, esta federación chama á intervención das administracións en seis grandes puntos: a regulación das rebaixas, os altos tributos que “aboamos á Administración local”, as cuotas da Seguridade Social que consideran “un despropósito”, o “prexuízo económico e a competencia desleal que supón a venda ambulante” e o establecemento dun gravame do 20% nas vendas online “e que este imposto repercuta no concello dende o cal se realiza a compra”. Piden das administracións unha “aposta firme polo comercio local”.