Superando un ano máis todas as expectativas, a Festa da Empanada de Costrelas organizada pola Asociación Cultural Sabugueiro en colaboración co Concello da Rúa, reunía no Campo de San Roque a unhas 400 persoas (50 máis que na pasada edición).
Servido un ano máis por Mantesil o menú estivo formado por sopas de allo, empanada de costelas elaboradas por Panadería Lorenzo e torta de roxóns, ademais de viño, auga e licores. Despois do xantar, a sobremesa estivo amenizada musicalmente pola disco móbil Danzalia, da Rúa. A organización ofrecía a posibilidade de reservar mesa e a maioría dos asistentes contaban xa co seu servizo.
A festa tamén traía este ano algunha novidade como o anuncio da orquestra que amenizará o día central das Festas de San Roque 2020: El Combo Dominicano. Asemade celebrábase o sorteo dunha gran Cesta de Nadal e vendíanse camisetas co debuxo gañador do concurso que a asociación lanzaba hai uns meses. Custan 10 euros e tamén se poden mercar no Colmado e no bar San Roque.
Con esta multitudinaria xuntanza gastronómica a Asociación Sabugueiro da Rúa Vella pon o broche a un completo ano de actividadese iniciativas para implicar á sociedade e dinamizar a vila. Dende as festas ata concursos, pasando por obradoiros. Entre os meses de outubro e novembro organizaron un infantil de decoración de cabazas e varios de decoración navideña, e de cara ao mes de xaneiro teñen previsto comezar un de murais “con tapóns de botellas”, puntualiza Víctor Ferradal dende a Asociación, moi satisfeito coa resposta da poboación.
Asistentes á festa entre eles Víctor Ferradal, da Asociación Cultural Sabugueiro.
Fotos: Carlos G. Hervella