CulturaCulturaGalerías de fotosÚltima hora

A Festa da Pisa de Froxan celebra unha multitudinaria 20ª edición

Tras a demostración de pisado e abandoxado, viña o pregón a cargo do actor galego Josito Porto, e logo o xantar do pisador

Un decembro máis, e xa van vinte, co sequeiro de Froxán (Folgoso do Courel) poñíase en marcha unha nova edición da Festa da Pisa da castaña seca na mañá do 8 de decembro. Abríase a porta desta antiga construción e comezaba entón o movemento de sacos de castaña, mentres os pisadores comezaban a tomar posición xunto ao tallo e numerosas persoas se ían achegando. O característico golpe seco sobre o tallo (un toro de madeira forrado con coiro) marcaba o inicio dunha pisa que se prolongaba ata pasadas ás 13:30h.

A medida que os sacos da pisa se ían baleirando do bandoxo, dábase paso ao seguinte paso do proceso, o abandoxado. Logo as castañas ían depositándose nun cesto e podían ser degustadas polos presentes. Numerosas persoas, moita delas cámara en man, seguían paso a paso este proceso tradicional que con esta festa recupera cada ano a Asociación Fonte do Milagro de Froxán. O ambiente, nunha soleada mañá, estaba animado polo grupo tradicional No Cómbaro (As Pontes). Tamén podía visitarse unha mostra de artesanía e de produtos gastronómicos da zona.

Arredor da unha e media o actor galego Josito Porto subíase ao alto das escaleiras para dar un pregón no que bromeaba cos significados da palabra pisa e no que pedía que se valorase esta celebración e tamén que os visitantes coidasen o entorno. Ademais subliñaba que as castañas tiñan superpoderes e contaba unha historia ao respecto que tiña ao seu fillo como protagonista. Ademais Evaristo Méndez en nome da asociación organizadora daba ás grazas aos presentes e tamén agradecía o labor da xente que traballou para facer posible este evento.

Seguidamente os asistentes comezaban a facer cola para o xantar do pisador, cun prezo de dez euros e cun menú que incluía, por suposto, castañas cocidas, panceta e chourizo, xunto cun saboroso doce de castañas. A festa continuaba pola tarde con demostracións do aserrado de madeira con serra, ademais de pisado e abandoxado. Tampouco faltaba a música e presentábase un libro de “Latinoeuropa” de Miguelanxo Lar.

Fotos: Carlos G. Hervella.

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close