A Festa do Boi, celebración con orixe en 1317 celebrarase este ano entre o 14 e o 22 de xuño. Para a ocasión, a Asociación Cultural Xan de Arzúa recupera un novo feito histórico relacionado coa festa: o Trato do Boi, que consiste na recreación teatralizada do trato que se realizaba para dispor de animais para as carreiras.
A edición deste ano da festa revivirá asemade a Entrega do sedeño aos veciños por parte do fiscal, xesto co que se autoriza o comezo dos festexos que se estenderán ao longo de toda unha semana.
Ao redor das actividades de carácter histórico que centran a celebración polas rúas de Allariz, a festa do 2014 mantén o esquema tradicional con música, citas gastronómicas, actividades específicas para os nenos e por suposto as carreiras do boi: 18 para adultos e 3 para os rapaces.
Nas carreiras atoparemos outra das novidades do programa deste ano, posto que por primeira vez nos últimos 31 anos os bois que protagonizarán a festa medieval serán do propio concello, criados nos montes de Penamá, tal como explicaban os membros da Asociación Xan de Arzúa e o alcalde de Allariz na presentación oficial celebrada na mañá do 10 de abril.
Foto: Carlos G. Hervella
Máis información na vindeira edición en papel do Periódico O Sil.
