A fotografía e o cine son os dous grandes protagonistas da XIII Festa do Codillo que se celebrará este sábado 25 de xaneiro. A primeira da man de Álvaro Rodríguez “Purre” fotógrafo rues que leva a imaxe da súa vila captada a través do obxectivo da súa cámara, alá por onde vai, e que recibirá un recoñecemento por parte do Concello no acto previo ao xantar, que se celebrará en torno ás 12h. no Centro Cultural Avenida.
O cine será o outro protagonista do día cunha pequena homenaxe ao Avenida que xa superou os 250.000 espectadores dende a súa reapertura en marzo de 1998. “Ao longo deste tempo, de forma intermitente, proxectáronse máis de mil filmes”, lembra o concelleiro de Cultura José Vicente Solarat, destacando Un paseo por la nubes con Keanu Reeves, Aitana Sánchez Gijón e Anthony Queen, o día da inauguración e Siete años en el Tíbet, a primeira cobrando entrada. E precisamente esa primeira película proxectada no cine trala reahabilitación por parte do Concello da Rúa será lembrada este sábado coa proxección do trailer a partir das 12:15h. “aberto ao público que nos quiera acompañar”, di Solarat.
Este será sen dúbida un ” Codillo de Cine” xa que tralo acto no CCA, as mesas preparadas para a ocasión no pavillón Victorino Núñez, no Aguillón, estarán personalizadas con títulos de filmes, lembrando clásicos como Memorias de África, Rocky, Regreso al futuro, Lo que el viento se llevó,…