Hoxe, 16 de decembro, ás 20:30h. inaugúrase no Liceo de Ourense, a exposición fotográfica colectiva da Agrupación FotoSíntese, “A Grandeza do Miúdo”.
Composta por 50 imaxes de 25 fotográfos da agrupación ourensá, a mostra fai unha pescuda pola beleza nos detalles, pola aproximación ao que se denomina efecto macro. “Pretendemos abrir unha fiestra a un microcosmos que o ollo humano non é quen de captar ou percibir. Amosar todo ese cosmos de posibilidades que a imaxe fotográfica nos posibilita neste terreo”, explican dende o colectivo fotográfico que agradece ao Liceo de Ourense “as facilidades amosadas para poder colocar esta exposición nas súas salas”.
A mostra dos fotógrafos de FotoSíntese, que reflicten coas súas instantáneas “unha visión máis de preto das cousas sinxelas e cotiáns que nos rodean”, permaneceá aberta ata o 31 de decembro.