En portadaGalerías de fotosÚltima hora

A historia da construción dos saltos do Sil, feita documental

O petinés Domingo Díaz estreaba na Rúa na noite do 5 de decembro o seu documental “O desafío do Sil”. Tamén se proxectará os días 6 e 7 de decembro ás 20:30h. no Centro Cultural Avenida con entrada libre

A historia dos saltos do Sil, da súa proxección e construción e os cambios socioeconómicos que implicaron no entorno no que se levantaron son os eixos centrais de “O desafío do Sil”, un documental con guión, dirección e produción do petinés Domingo Díaz. Este traballo presentábase no Centro Cultural Avenida da Rúa na noite do 5 de decembro cunha gran asistencia de público, entre o que estaban responsables de Iberdrola como Miguel Ángel López, director da conca do Sil; e Francisco Silva representante da Fundación Iberdrola, así como diversos representantes políticos da comarca.

Antes da proxección interviñan o alcalde da Rúa, Luis Fernández, quen agradecía ao director o seu traballo e esforzo, e o propio Domingo Díaz, que explicaba como se xestaba este filme. “Cheguei a este documental por unha casualidade. Un día saíndo dunha biblioteca vin un libro titulado Construccion de Los Saltos del Sil 1945-1965 de Susana Chávarri, que hoxe está aquí con nós”, lembraba. Leuno con rapidez e descubriu que falaba “dun tema que coñecía, saian os pais dos meus amigos e dixen, teño que facer disto un documental”.

Tamén comentaba que se fixeron dúas montaxes, xa que ao rematar a primeira conseguían moito máis material de “arquivo e decidimos utilizalo”. E resaltaba certas claves que quixo tratar nesta traballo: “a capacidade de esforzo desa xeración”, “a audacia dos enxeñeiros ao facer obras pioneiras en Europa” e “o cambio social e transformación que se produciu arredor desas presas”. Ademais agradecía o apoio dos concellos da Rúa e Petín e tamén o de Iberdrola “que nos permitiu entrar en todos os sitios e centrais”.

Despois apagábanse as luces do Centro Cultural Avenida e sobre a pantalla contábase o relato dun proxecto empresarial ligado ao aproveitamento dun recurso natural: a auga do Sil. Un relato no que se mesturan imaxes actuais con outras antigas de diversos arquivos, ademais da narración da historiadora Susana Chávarri e dos testemuños dalgúns dos seus protagonistas: topógrafos, traballadores das obras, persoal administrativo…

Este documental, cunha duración de 65 minutos, está rodado en localizacións da Rúa, O Bolo, Vilariño de Conso, Nogueira de Ramuín, Os Peares… Así como noutras zonas fóra da provincia de Ourense como Quiroga e Ribas de Sil (Lugo) e as comarcas leoneas de Babia, Laciana e O Bierzo. É un traballo que remata cunha dedicatoria a “unha xeración que nos ensinou o valor do esforzo”.

Tras o pase deste documental había unha pinchada para os asistentes no mesmo hall do Centro Cultural Avenida.

Fotos: Carlos G. Hervella.

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close