Punxeiro celebra a IX Festa da Vendima, unha cita que este ano está prevista para o 10 de outubro. O seu programa comezará a partires das seis e media da tarde coa lectura do pregón na praza de Punxeiro. Previamente os participantes poderán mercar a súa entrada a un prezo de 13 euros.
O punto de partida do percorrido acostuma ser a praza. Dende alí o son de tres grupos (Os Bertolini, a Charanga Madialeva e a Sorpresa) irá guiando o percorrido polas tres primeiras adegas. Ademais de viño, os participantes poderán degustar unha gran amplitude e variedade de pinchos salgados e tamén doces, elaborados polos veciños de Punxeiro. Logo irán visitándose ás seguintes. A partires das once da noite a celebración continuará no campo da festa coa actuación dos grupos Tekila e Yucatán.
Para facilitar o acceso de visitantes a organización ofrecerá un servizo de autobuses que partirá da praza de Viana ás 17h. e regresará ao fin da festa. Tamén se disporá dunha zona de acampada libre. Esta IX Festa da Vendima será organizada pola Comisión de Festas de Punxeiro.