Coa felicitación da secretaria xeral para o Deportes Marta Míguez aos deportistas “por teren conseguido o obxectivo de ser admitidos como bolseiros do centro, cousa que non é doada”, inaugurábase na mañá do 17 de setembro, o novo curso do Centro Galego de Tecnificación Deportiva que este ano conta cun 14% máis de bolseiros.
Entre eles (un total de 101), catro karatekas que reciben por primeira vez a beca. Tres da provincia da Coruña e unha de Ourense. A única ourensá é a barquense Lucía Herrero Valcarce, membro do KC River Stone que leva competindo en kumite dende nena e que este ano cursará 1º de Bacharelato no instituto Sánchez Cantón de Pontevedra.
No acto, Marta Míguez animou aos deportistas presentes no inicio do curso a “seguir sendo un exemplo de comportamento e de xogo limpo, de constancia, perseveranza e de respecto ao rival” e lembrou que “desde a Secretaría Xeral para o Deporte estamos tratando de mellorar o deporte galego en todos os seus ámbitos” tanto no relativo a instalacións, competicións e deporte en idade escolar, formación, subvencións a clubes e federacións e apoiando aos equipos de alto nivel para o que “temos no CGTD unha das nosas mellores ferramentas que poremos á vosa disposición para que consigades grandes éxitos dos que Galicia será partícipe e beneficiaria”.
