En portadaGalerías de fotosÚltima hora

A loita contra a despoboación rural a través do Entroido

O Fulión da Mourela p’acá, que reúne a veciños de varias aldeas desta zona de Manzaneda, vén de iniciar en Trabazos o seu calendario de visitas a pobos neste Entroido

Había xa moitos anos que a voz das cornas, bombos, sachos e gadañas non enchía as rúas de Trabazos (Manzaneda). Tampouco as Mázcaras danzaban polas súas rúas. Iso cambiaba no Entroido do 2016, cando o folión da Mourela p’acá visitaba esta aldea e lle devolvía a ilusión de participar e sentir unha das súas tradicións máis enxebres: o fulión.

Dende entón esta singular comitiva sonora, encabezada polas Mázcaras, volve cada Entroido ata esta aldea da man do Fulión da Mourela p’acá, que reúne a veciños de varias localidades desta zona de Manzaneda. A despoboación fai mella no rural, cada vez hai menos veciños e menos xente nova, pero a ilusión por manter esta tradición permanece e segue unindo aos pobos. E así xurdiu a idea de facer un percorrido por cada unha destas aldeas e visitar aos seus habitantes no tempo do Entroido como un xeito de devolverlles á vida e de compartir con eles unha celebración tan especial. Neste ano o calendario de visitas encetábase en Trabazos.

Os veciños visitados amosan o seu agradecemento convidando aos membros do fulión durante a ronda, con bebida e aperitivos, e despois, ao completar a ronda, cunha cea, que acostuma celebrarse no baixo máis amplo da vila, para poder acoller á toda a xente. Despois de Trabazos virán outras aldeas ata completar as datas da festa. Este é un exemplo, dos moitos que afortunamente hai no Entroido da provincia de Ourense, do esforzo por perpetuar a tradición e a vida no rural pese á situación demográfica actual.

Tamén os folións percorren as diferentes aldeas de Viana ou de Vilariño de Conso e mesmo ás da Gudiña, enchéndoas de xente e congregando a veciños e visitantes en torno a unha celebración ancestral que loitan por perpetuar e con ela, a memoria dos seus pobos.

Fotos: Carlos G. Hervella.

 

Dúas das Mázcaras deste fulión, unha delas de Trabazos./ Foto: Carlos G. Hervella.

 

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close