OurenseÚltima hora

A maxia do teatro encantará Ourense do 16 ao 30 de abril

A XX MITEU contará con máis de 30 espectáculos de grupos universitarios e profesionais nacionais e internacionais
Presentación en Ourense da XX edición da MITEU.
Presentación en Ourense da XX edición da MITEU.

Preto de 30 grupos universitarios e compañías profesionais de Galicia, Portugal, Castela-A Mancha, Castela León, Andalucía, Madrid, Portugal, Navarra, Cantabria, Brasil, Cabo Verde, Bélxica, Irán, Estados Unidos, Italia e Honduras, participarán na XX Mostra Internacional de Teatro Universitario de Ourense (MITEU) que se celebrará do 16 ao 30 de abril. Máis de 30 espectáculos de teatro, danza e circo, combinados con concertos, documentais, unha exposición, un obradoiro e clases maxistrais, converterán a cidade nun espazo de encontro de actores, directores, guionistas e público.

O 16 de abril, a aula de teatro universitario de Ourense Rosaura será a encargada de abrir a programación, coa estrea da obra “Donos do tempo”, nunha xornada que tamén contará coas actuacións da aula de teatro ourensá Cordelia e da compañía andaluza Zen del Sur, para rematar co concerto do grupo galego Raindogs. O venres 17 de abril será a quenda do grupo universitario de Castela-A Mancha Malaestirpe e da compañía belga Okidok.

Na fin de semana, o sábado 17 comezará co espectáculo da aula de teatro de Santiago, que ofrecerá unha adaptación libre do musical de Broadway, coa colaboración da Orquestra de Cámara da USC. A xornada rematará co V Encontro de Danza Interuniversitaria, no que participarán as compañías das universidades da Coruña e de Santiago, Miriam Centro de Danza, de Ourense, e Tics Espazo de Danza. O día 19, a aula de teatro infantil Geppetto de Ourense fará gozar os nenos e nenas coa obra “As aventuras de Polgariña”. A continuación, Teatro El Mayal, da Universidade de León, representará a obra “Hotel Las Vegas”.

A semana seguinte comezará cos espectáculos “Degüello”, o luns 20 de abril, e “Cartas de las golondrinas”, o martes 21, que porán en escena a aula de teatro universitario de Huelva e a compañía Escena Miriñaque, de Cantabria, respectivamente. A programación teatral galega e lusófona será a protagonista o mércores 22 de abril, co espectáculo “Pangeia”, de Limiar Teatro e Acaso Danza, e máis coa obra “Pessoa… Pessoa…”, da compañía Somá Cambá de Cabo Verde.

A obra “Pequenos actos pseudorrevolucionarios” da compañía galega Ibuprofeno Teatro, abrirá a xornada do día 23, que tamén contará co concerto do grupo Igmig e coa estrea en Galicia de “La gran misa patólica”.

O actor Leo Bassi será o encargado de ofrecer unha clase maxistral, o xoves 24, para afondar nun sistema que mestura a teoría con orixinais xogos psicolóxicos. Ese día tamén actuarán o grupo de teatro universitario de Belas Artes da Complutense e a compañía Asta Teatro de Portugal. Xa na fin de semana, a MITEU ofrecerá os espectáculos “A casa do vestido castanho” de Teatr’Ubi, e “Shakespeare, Love, 2001” da compañía de Irán Sokoot.

Corifeo Teatro da Coruña afondarán na espera e na desesperación co seu espectáculo “Salas de espera”, o luns 27. Ese mesmo día tamén actuarán a aula de teatro universitario da Coruña Normal, coa obra “Augusta”, e a compañía de teatro da USC do campus de Lugo, que interpretará “Lear. Da nada sae a nada”.

O martes 28 de abril será a quenda do grupo de teatro universitario de Navarra, coa obra “Besos”. Ao día seguinte proxectarase o documental “Access to the danger zone”. Pechará a programación do mércores o espectáculo “De cómo moría y resucitaba Lázaro”, da Asociación Teatro Taller Tegucigalpa de Honduras.

Na xornada de clausura, o 30 de abril, ademais da entrega de premios do xurado e do espectador Carlos Couceiro e Begoña Muñoz, así como á mellor resolución técnica Suso Díaz, a organización da MITEU outorgaralle o premio da súa vixésima edición aos Perqtores de Seixalbo, pola súa implicación e colaboración coa mostra desde hai anos. Finalmente, a mostra rematará co espectáculo “III”, da aula de teatro ourensá Maricastaña, e coa representación da obra “The Gagfather”, do grupo madrileño Yllana.

O auditorio, o teatro principal, o campus, así como diversas rúas e locais de Ourense serán os escenarios desta nova edición da MITEU, que tamén incluirá coloquios, unha exposición e un obradoiro de teatro do grupo Sokoot Theatre Group de Irán, o día 24 de abril.

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close