Non é a primeira vez que actúa na Cidade da Cultura, en Santiago de Compostela, pero desta volta faráo recibindo ademais un galardón. A pianista galega Isabel Pérez Dobarro recollerá mañá, venres 6 de marzo, o premio “Mulleres-Talento dende as orixes” que entrega a Secretaría Xeral de Iguadade, nun acto no que tamén tocará algunha peza ao piano. E faráo cun traxe da modista galega Marisu Miranda, natural do Barco de Valdeorras.
Ámbalas dúas artistas residen en Nova York (EE.UU.) e alí foi onde se coñeceron. Tal como explica a Marisu Miranda (modista, empresaria, ilustradora,…), a pianista sempre viste con prendas de modistos galegos, e nesta ocasión faráo cun vestido seu, un lino “inspirado en encaixes galegos e con estilo español”, puntualiza a barquense, asegurando que tanto ela como Isabel son grandes apaixoadas da súa terra, promocioándoa sempre que poden. “Neste mes irá a outros actos con traxes meus e ademais estame axudando a exhibir a miña exposición das Dúas Marías e da muller española. É unha gran colaboración”, conclúe orgullosa Marisu.
Natural de Santiago de Compostela e graduada en Dereito (tamén estudou Relacións Internacionais en Harvard), Isabel Pérez ten un amplo currículo profesional, chegando a falar en dúas ocasións na Asemblea Xeral da ONU. Como pianista tocou por medio mundo participando asemade na xira navideña de Carlos Núñez.