Tras expoñerse ao público o pasado decembro na localidade vilamartinesa de Córgomo, a sexta edición da mostra Córgomo Arte, titulada “Abismos entre a sombra e a alma” exporase en setembro no Cenima de Foz. O acto inaugural da exposición está previsto para ás 20:30h. do vindeiro luns 3 de setembro.
Na mostra poderán verse as obras de Manuel Conde (Córgomo), Victorino Núñez “Torino” (Carballal de Petín), Patricia Arellano (Burela), Cristina Basanta (Viveiro) e Lu Vila (Barreiros), Martín Lestao (Burela), Patricia Fernández Paz (Chantada) e David Catá, artista convidado nesta “Edición Mariña”.
Córgomo Arte é o proxecto persoal de Manolo Conde e Victorino Núñez, un exemplo de iniciativa de comunidade que integra a arte contemporánea nos ritmos vitais e culturais do rural. Por vez primeira vai deixar a comarca de Valdeorras para tratar de tender pontes e estender o efecto contaxio á comarca da Mariña de Lugo. A mostra, comisariada por Silvia Fiallega, poderá visitarse en Foz ata o 15 de setembro.
