Na tarde e noite do vindeiro 7 de xuño terá lugar na Rúa unha nova edición da “Noite dos Descontos” coa participación de oito establecementos que nese día ampliarán o seu horario ata a medianoite e ofrecerán produtos tempada a prezos rebaixados (no horario de 20h. a 24h.) e degustacións diversas (petiscos, aperitivos, froita, doces, bebida…) aos seus clientes para dinamizar dese xeito as compras. Ademais haberá animación nas rúas desta vila valdeorresa coas actuacións da Banda de gaitas de Abertal e da Charanga Sorcha.
Nesta quinta edición da campaña, promovida dende a Asociación Empresarial de Valdeorras (AEVA) en colaboración co Concello da Rúa, participarán Deportes Aris, Perfumería Compostela, Mercería Raquel, Confecciones Rosendo, Tri-Sport, Okre, Fíos e Arnaveca Comunicación.
O lema desta singular proposta promocional pola que aposta o comercio rues é “Pasa unha noite de lecer na Rúa”. Estes comercios estarán identificados no exterior cunha decoración especial, como en ocasións anteriores, e mesmo algúns exporán os seus produtos na rúa para achegarse tamén deste xeito ao público.
