En portadaGalerías de fotosÚltima hora

A música de Kepa Junkera fusiónase en “Mar de Terra” coas faces máis ancestrais e os ritmos do Entroido galego

Este documental, que retrata a modo de “road movie” a descuberta do músico vasco desta tradición, estreábase na gala inaugural do 23 OUFF

Son apenas 50 minutos, pero moi intensos en tradicións, emocións, vivencias, celebración e amizade. “Mar de Terra” retrata en imaxes, palabras e, sobre todo ritmos, a descuberta persoal dalgúns dos Entroidos máis ancestrais de Galicia por parte do músico vasco Kepa Junkera. Está dirixido por J.A. Blanco e producido por Javier Torquati. Ambos acompañaban no escenario do Auditorio de Ourense a Junkera o 29 de novembro na gala inaugural do 23 OUFF, na que se estreaba este traballo “moi sinceiro, persoal e feito dende a amizade”.

É un documental, contado a modo de “road movie” que nacía sobre a marcha, case se xeito espontáneo e que ía cobrando forma a medida que no pasado febreiro Junkera visitaba en tempo de Entroido a unha serie de amigos en Laza, Santiago de Arriba (Chantada), Xinzo de Limia, Salcedo (A Pobra do Brollón), Viana do Bolo, Verín, e, posteriormente Vilariño de Conso e Manzaneda.

A proxección deste documental poñía ao broche dun xeito moi particular á gala de apertura do festival, presentada pola actriz ourensá Ledicia Sola, e na que tamén tomaba a palabra o coordinador artístico do OUFF, Miguel Anxo Fernández, quen agradeceu ao presidente da Deputación de Ourense, Manuel Baltar, o seu empeño en sacar adiante esta edición do 2018 do festival. “Pretendemos que a sociedade ourensá recupere a estima no seu festival”, destacaba. Deseguido, o presidente da Deputación era o que se subía ao escenario para facer entrega da Calpurnia de horna ao cineasta ourensán Xavier Bermúdez, quen aseguraba que o galardón convertése “nunha obriga para seguir facendo películas que leven o nome e a imaxe de Galicia e de Ourense polo mundo”.

A continuación soaba a música de Kepa Junkera á trikititxa, acompañado á percusión por dous músicos de Xinzo. Era o limiar da presentación de “Mar de Terra”, o momento máis esperado da noite. Unha proxección que remataba entre aplausos e cunha sorpresa moi especial: as máscaras dos Entroidos do documental ían aparecendo por cada recuncho do auditorio e subíndose ao escenario mentres Junkera, acompañado polo grupo Cidade de Antioquía de Xinzo, interpretaba a “Marcha dos Entroidos” e, finalmente, o seu coñecido tema “Bok-Espok”, co público en pé.

Texto: A.R.

Fotos: Carlos G. Hervella.

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close