Dende a Xerencia de Xestión Integrada do Servizo Galego de Saúde en Ourense vén de adxudicarse, por 3.145.391,90€, a Fagor Industrial S. Coop. a adaptación, instalación e equipamento, nun prazo de tres meses, da nova cociña central do Hospital Universitario de Ourense, na que se investirá un total de 4.673.391 euros.
As novas instalacións, de máis de 1.400 metros cadrados, situadas no centro do hospital, na planta -2 do novo edificio de hospitalización, contarán, segundo se informa dende o Sergas, “cun sistema de liña mixta, fría-quente, cun equipamento que se adapta aos últimos avances do sector de mellora da trazabilidade e seguridade alimentaria, ademais da operatividade e condicións de traballo do seu persoal, que continuará asumindo e xestionando este servizo, tradicionalmente moi ben valorado en Ourense”.
Este novo sistema mixto “complementarase cun sistema de distribución de comidas, mediante carros de retermalización por termoconvección, que permitirán que ésta chegue ao paciente coa temperatura, e características organolépticas, máis adecuadas e satisfactorias. A licitación destes equipos está prevista tamén para este mes e sumará un investimento de 1.528.000 € “, matizan dende o Sergas.
Os novos espazos contan con luz natural e adáptanse as necesidades de circulacións e de cada estación de traballo, con climatización en todas e cada unha das áreas. Distribúense en cinco grandes zonas: Recepción/Almacenamento, Preparación, Elaboración, Distribución e Lavado.
Máis de 80 profesionais, na Sección de Alimentación e Cociña do hospital ourensán
A Sección de Alimentación e Cociña do Hospital Universitario de Ourense, conta na actualidade cun cadro de persoal composto por mais de 80 profesionais, pinches e cociñeiros, repartidos nas distintas quendas. Son responsables da elaboración de entre 24 e 30 tipos de pratos por quenda, cunha media diaria anual de 850 menús, nos que se inclúen as 65 dietas basais e terapéuticas, que se sirven no hospital, todos eles supervisados por unha nutricionista.
Para Antonio Pazos, xefe da Sección de Alimentación, o cambio agárdase con ilusión por parte de todo o persoal de cociña, xa que as novas instalacións son un reto moi desexado para os responsables do maior “restaurante” de Ourense en volumen de servizos.
Mostra delo, son os alimentos que moven ao ano. A súa unidade de control e xestión de compras realiza pedidos para atender un consumo anual de 30.000 kg. de peixe; 55.000 kg. de carne; 50.000 kg. de froitas; 150.000 kg. de hortalizas e verduras; 700.000 unidades de pan; 650.000 postres lácteos; 15.000 litros de aceite, primando o virxe extra, ou 72.000 ovos.
Isto require unha complexa loxística de compra e xestión de provedores, na que se aposta polo produto fresco de proximidade, para dar satisfacción non so á demanda da cociña senón ao paciente. “Contamos con profesionais en cada unha das áreas, na procura da mellor calidade posible, xa que noso obxectivo é alimentar e nutrir aos nosos pacientes, pero tamén contribuir co noso traballo a satisfacelos, para que súa estanza sexa tamén mais levadeira” dí o xefe de cociña.
