Tal como adiantaba o alcalde da Rúa Álvaro Fernández hai un par de semanas, na mañá deste luns 2 de maio a Oficina de Turismo-A Rúa poñíase de novo en marcha, con Soledad Figueroa de Solfiro Comunicación á fronte, acompañada novamente por Susana de la Cruz e Luis Carrón, e coa mesma función dinamizadora.
Así, á parte de traballar como punto de información tamén o fará “na integración das distintas asociacións para organizar e coordinar as actividades porque canta máis xente haxa implicada, mellor, máis alá do que poida organiza o Concello”, en palabras do alcalde.
Con respecto á función informativa, sendo punto de selado de credenciais a oficina de turismo é parada obrigada para os peregrinos que están facendo o Camiño de Inverno e esta mesma mañá recibían ao primeiro da Bretaña francesa… “Todo un peregrino que leva percorrido moitos camiños”, asegura Soledad.
Nesta nova etapa que comeza hoxe, a oficina cambia de horario e permanecerá aberta todos os días (domingos e festivos incluídos) de 10 a 14 horas; e os venres e sábados tamén de 17 a 20 horas.
Fotos cedidas.