Dende o Arco da Vella, e despois de percorrer galaxias, Cholo e Nela mandáronnos esta mensaxe por whatsapp e por correo electrónico:
“Queridos amigos e amigas que organizades a nosa festa, e tamén a todas as mamás, papás, familias e profes que participades nese día de ledicia, e as institucións que colaboran e se divirten connosco, e sobre todo a tódolos nenos e nenas que ían participar coma sempre, con ledicia, ilusión e con moitas ganas de xogar connosco.
A pandemia declarada na data de hoxe, 11 de marzo de 2020, pola OMS por mor do COVID-19 e as decisións adoptadas polo Goberno e a Xunta de Galicia ante a situación que se está a vivir, desaconsellan que este ano nos poidamos reunir, pois , a data de hoxe, non sabemos se isto sería posible no mes de Maio.
A organización da festa de Cholo e Nela implica a toma de decisións e un traballo importante polo equipo organizador, en distintos ámbitos: deseño de xogos, obradoiros, xestións económicas, institucionais, nos meses previos. Isto require un traballo previo de meses, especialmente intenso nos meses de abril e maio. A incerteza da situación aconsella a suspensión da actividade, dende a responsabilidade.
Por iso lamentamos que este ano non poidamos celebrar a nosa reunión e convivencia.
Ao mesmo tempo comezamos dende xa un camiño para chegar a Maio do 21 e vérmonos de novo.
Lavade ben as mans con moito xabón e facerlle caso ás profes e aos profes…
Mil biquiños dixitais dende o Arco da Vella”
Cholo e Nela