Publicidade
Galerías de fotosOurenseÚltima hora

A pintura do barquense Jesús Díaz regresa ao Liceo de Ourense

Nesta sala expoñía o creador valdeorrés por vez primeira en 1945, apadriñado daquela por Vicente Risco

Despois de 74 anos, a obra pictórica de Jesús Díaz Ferrer (O Barco, 1922 – Concud. Teruel, 2017) regresa ao Liceo de Ourense. Na tarde do 5 de abril inaugurábase a exposición “Crónica de Maio. París 1968”, formada por 55 obras en papel e madeira, acrílicos e tintas augadas en cor e branco e negro, coas que o artista, que vivía naquela altura na capital francesa retratou ese momento histórico.

Deste xeito conclúe na cidade da Ourense a itinerancia dunha mostra que comezaba hai un ano no Barco e que a levou por Santiago, Muros, A Coruña, Monforte e Allariz. Este peche en Ourense é moi especial xa que a pintura de Díaz Ferrer reencóntrase coa sala na que expoñía por primeira vez en 1945, apadriñado por Vicente Risco. Nesta ocasión a mostra chega promovida a través da Asociación Amigos da República de Ourense.

O acto inaugural do pasado venres contaba coa asistencia do presidente da Asociación Amigos da República de Ourense, coa viúva de Díaz Ferrer, Micheline Langlois, e co curador da exposición e estudoso da obra deste pintor, o historiador da arte barquense Luís Enrique Rodríguez Arias “Coquixo”. Esta proposta expositiva poderá visitarse na cidade das Burgas ata o 30 de abril.

“Crónica de Maio. París 1068” é unha exposición producida polo Concello do Barco coincidindo co 50 aniversario deses acontecementos para dar a coñecer a este artista polifacético e de intensa traxectoria que deixou O Barco aos 17 anos. Viviu en Madrid e París, participando nos movementos de vangarda que impregnan as súas creacións, ata o ano 1981 que regresa a España para instalarse en Teruel.

Fotos cedidas por Luís Enrique Rodríguez “Coquixo”.

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close