En portada

A posta en valor turística da minería romana na Galicia interior terá que esperar

O partido socialista presentaba no Parlamento galego unha proposición non de lei pedindo un estudo para o aproveitamento turístico das minas auríferas romanas das provincias de Lugo e Ourense, pero non logrou o apoio do PP
Médulas de Caldesiños en Viana do Bolo. /Foto: Carlos G. Hervella
Médulas de Caldesiños en Viana do Bolo. /Foto: Carlos G. Hervella

Oito votos en contra do PP e cinco votos a favor do PSdeG-PSOE, BNG e AGE. Este foi o resultado da votación da proposición non de lei relativa á posta en valor turística da minería de ouro romana da Galicia interior que presentaba o PSdeG-PSOE no Parlamento galego. Era un dos puntos da orde do día da Comisión 6ª de Industria, Enerxía, Comercio e Turismo que se celebraba na mañá do 2 de abril.

Nesta proposición non de lei, que foi defendida na comisión pola deputada valdeorresa do PSdeG-PSOE Carmen Acuña destacaba a enorme relevancia dos restos de explotacións mineiras existentes en comarcas ourensás como a de Valdeorras e Terra Trives, así como noutros puntos de Ourense e mesmo en zonas do sur de Lugo como é o caso de Quiroga e Ribas de Sil. Ademais indicía no interese de crear unha oferta turística conxunta galega e poñela en relación coa que xa existe no xacemento das Médulas, Patrimonio da Humanidade dende o ano 1997, e polo que pasan ao ano milleiros de visitantes. Por iso na proposición presentada pedíase ao Parlamento galego que “instase á Xunta de Galicia a iniciar, de forma inmediata, un estudo sobre as posibilidades turísticas da pegada da minería nas terras do sur de Ourense, tratando de unir a oferta á que xa se fai dende as Médulas de León e creando a ruta turística da minería romana polas terras da Galicia interior, Ourense e Lugo”.

Acuña salientou que este sería “un recurso turístico novo, non estacional” que favorecería o desenvolvemento das provincias de Lugo e Ourense, “as grandes esquecidas”. Ademais lembrou que esta iniciativa xurdiu a raíz dun traballo xornalístico realizado polo Periódico O SIL que despois se convertiría no libro “Ouro na Galicia interior. Minería romana”. “Este patrimonio”, resaltaba a deputada, “merece unha especial atención do Goberno polas sinerxias turísticas que se poderían xerar co Bierzo”. Para elo, engadía, “deberá comezarse co estudo e catalogación dos recursos, para poñelos en valor dunha maneira global”.

Esta proposta contou co apoio dos grupos do BNG e de AGE, que coincidiron no interese desta iniciativa, pero non cos do PP, que presentou unha emenda de substitución coa que pretendía cambiar a petición socialista pola seguinte: “O Parlamento de Galicia, insta á Xunta de Galicia a trasladar aos concellos que conforman o Xeodestino nº12, a importancia de que no Plan Director, que elaborará o Inorde, se teñan en conta as posibilidades turísticas da pegada da minería na provincia de Ourense, tratando de unir a oferta á que xa se fai dende as Médulas de León”. Así o sinalaba dende o grupo parlamentario do PP, o valdeorrés Moisés Blanco.

Tamén explicou que o Plan Integral de Turismo de Galicia 2014-2016 xa contempla a promoción do turismo cultural (herdanza da romanización) e o turismo industrial (apoio á recuperación a través dun uso que contribúa á súa conservación e difusión).

No turno de réplica, Carmen Acuña reprochoulle a Blanco que “cada vez que o noso grupo trae unha iniciativa con algo a favor de Valdeorras, vostede impide que prospere”. E díxolle que “cando menos non estorbe” e pedíulle o seu voto favorable a esta iniciativa e que deixara de “poñerlle trabas a Valdeorras”. Para Acuña a enmenda de substitución dos populares “bota a pelota para o tellado dos concellos”. Tamén lle ofreceu, sen éxito a oportunidade de incorporala como engadido, porque consideraba que hai que “recuperar e poñer en valor e para iso as adminstracións locais non teñen capacidade”. Acuña tamén subliñou que “o verdadeiro valor da oferta o daría dar diversidade e magnitude á minería”, da que existen restos alomenos en 20 concellos das provincias de Lugo e Ourense.

Finalmente a proposta non saiu adiante ao votar en contra os 8 representantes do PP, fronte aos cinco votos a favor de PSdeG-PSOE BNG e AGE.

A socialista Carmen Acuña, na comisión de Cultura do Parlamento.
A socialista Carmen Acuña, na comisión de Cultura do Parlamento.
O deputado do PP, Moisés Blanco.
O deputado do PP, Moisés Blanco.

Artigos relacionados

Deixa unha resposta

O teu enderezo electrónico non se publicará Os campos obrigatorios están marcados con *

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close