Era un partido de fortes emocións e no que o C.D. Barco tivo nas mans un ascenso que, finalmente, acabou por esvaecerse, rematando así co soño do ascenso vermello. Ata o campo do Espiñeiro se desprazaba na tarde do 19 de maio o conxunto de Manolo Pérez para xogar o derradeiro partido da liga contra o C.D. Arenteiro. O club barquense acudía arroupado por un gran número de siareiros barquenses que o apoiaron e animaron incansablemente ata o final nun ambiente espectacular.
A primeira parte remataba con alegría e esperanza. O C.D. Barco adiantábase no marcador no minuto 28 cun gol de Tabala, que enchía de euforia á afección que abarrotaba as bancadas. Sen embargo, e malia que o partido remataba coa vitoria dos barquenses, o feito de que o Alondras anotase na segunda parte do encontro co Bergantiños e asegurase a cuarta praza, truncaba o soño dos valdeorreses.
Desta volta non puido ser, pero a afección vermella respondía ata o final apoiando e volcándose cun equipo que lle fixo vivir o soño de ascender case ata os últimos minutos desta emocionante e intensa liga.
Fotos: Carlos G. Hervella.