Nova xornada de subida nos casos activos de Covid-19 na provincia de Ourense, cun total de 145 pacientes, 14 máis que onte, segundo a actualización de datos que vén de publicar a Dirección Xeral de Saúde Pública da Consellería de Sanidade.
Entre os novos casos rexistrados atópanse os sete do brote de Viana do Bolo, que cos anteriores suman un total de trece pacientes positivos na vila.
No conxunto de Galicia o número de casos activos de coronavirus é de 1.623, deles 960 son da área da Coruña, 136 da de Lugo, os 145 da de Ourense xa mencionados, 84 da de Pontevedra, 138 da área de Vigo, 91 da de Santiago, e 69 da de Ferrol.
Ademais, do total de pacientes positivos, 5 están en UCI, 55 en unidades de hospitalización e 1.563 no domicilio. Polo de agora, en Galicia hai un total de 11.657 persoas curadas, rexistrándose 625 falecementos.
