Mantense o ascenso no número de casos de coronavirus na Área Sanitaria de Ourense, Verín e O Barco de Valdeorras. A última actualización publicada pola Dirección Xeral de Saúde Pública da Consellería de Sanidade inclúe un total de 157 casos activos, o que supón un incremento de 12 con respecto á xornada de onte.
Deste total de pacientes, un está ingresado na UCI do Hospital Universitario de Ourense e seis en planta, mentres que os 150 restantes permanecen a seguimiento a domicilio. O total de casos rexistrados na provincia ascende a 2.203, con 1.912 curados e 134 falecementos. O total de probas PCR realizadas é de 39.559.
Tres novos pacientes que estaban en situación de illamento domiciliario foron ingresados na tarde de onte mércores no Hospital Universitario de Ourense, segundo informa o Sergas. Trátase de dúas mulleres de 82 e 42 anos e dun mozo de 24 anos de idade o que fai un total de seis pacientes ingresados nas unidades de hospitalización e un paciente na Unidade de Coidados Intensivos.
O brote de Viana do Bolo suma xa 14 casos, mentres que onte producíase un novo brote na provincia, en Vilamarín.
No conxunto de Galicia o total de casos é de 1.783, dos que 1.045 son da área sanitaria da Coruña, 170 da de Lugo, os 157 xa citados da de Ourense, 80 da de Pontevedra, 141 da área de Vigo, 113 da de Santiago, e 77 da de Ferrol.
Do total de pacientes positivos, 6 están en UCI, 64 en unidades de hospitalización e 1.713 no domicilio. Polo de agora, en Galicia hai un total de 11.701 persoas curadas, rexistrándose 626 falecementos. A última persoa falecida foi un home de 90 anos que estaba ingresado no CHUAC e presentaba patoloxías previas.
O número de PCR realizadas é de 290.491.
