A primeiros de abril, o Concello de Manzaneda tomaba a decisión de trasladar a parte dos usuarios da Residencia de maiores Gabino García Fernández ao Centro de Día municipal, “para así protexelos da mellor forma posible fronte ao Covid-19″. Este traslado contaba coas autorizacións das autoridades pertinentes.
Agora, dous meses despois daquela medida (nos que tanto a residencia como o resto do municipio de Manzaneda estiveron libres de virus), os usuarios que foron separados xa regresaron á residencia de maiores da vila. “Entre onte e hoxe foron trasladados os anciáns que estaban no Centro de Día”, confirma o alcalde de Manzaneda, Amable Fernández.
Ademais a partir deste mércores 3 de xuño, os residentes deste centro de maiores poderán recibir visitas, nas que “deberán cumprirse todos os protocolos marcados polas autoridades sanitarias”, tal e como adianta o rexedor.
