Coa novena á Nosa Señora dos Remedios o 30 de agosto iniciábanse os actos da tradicional Romaría da Ermida (Quiroga), cuxos días grandes serán o 8 e o 9 de setembro. “Os actos serán moi similares aos do ano pasado, todos ao aire libre con misas no adro da igrexa e gardando estritamente as medidas de seguridade”, adianta Amparo Montenegro, da Asociación Souto do Val, entidade que organiza xunto coa parroquia esta romaría.
Para este día 7 de setembro estaba prevista misa e novena ás 9:30h., procesión ás 19:30h. e ás 20h. misa e novena.
O programa relixioso do día 8 inclúe misas ás 9:30h., ás 11h. e ás 12h. e, xa ás 13h., procesión e misa. Se ben nesta procesión non sairán as figuras ancestrais do Meco e das Pampórnigas. Ademais nesa xornada haberá un pasarrúas coa Charanga Louband (a cargo da Deputación de Lugo). Na xornada do 9 de setembro oficiaranse eucaristías ás 9:30h., 11h. e ás 13h. terá lugar a procesión e a derradeira misa.
“As tres procesións da romaría faranse como o pasado ano: só participarán nelas as persoas que portan o estandarte e a imaxe da Virxe, os demais agardarán no adro”, matiza Amparo Montenegro.
