CulturaGalerías de fotosMúsicaÚltima hora

A Rúa acolle a gran festa do acordeón

Máis de 35 acordeonistas participaron no Día Mundial do Acordeón organizado por Abertal

O Día Mundial do Acordeón é o 6 de maio, pero na Rúa decidían aproveitar a fin de semana e adiantaban a celebración catro días. Así, na tarde-noite do sábado 2 de maio, o abarrotado Centro Cultural Avenida acollía un gran festival musical co acordeón como gran protagonista.

O acto, organizado pola Escola de Música e Baile Tradicional Abertal en colaboración co Concello, contou coa magnífica actuación de máis de 35 músicos, da comarca de Valdeorras e doutros puntos de Galicia (especialmente da provincia de Pontevedra), algúns xa consagrados e outros que tocaban por primeira vez diante do público.

Da man do profesor de acordeón de Abertal dende hai sete anos, Manuel Olegario, a gran festa do acordeón arrancaba coa actuación das alumnas máis pequenas da escola, e pouco a pouco ía subindo o nivel. Houbo actuacións de solistas, de dúos e ata de quintetos, contando asemade co grupo de acordeóns Tarataña de Vigo e co dúo de virtuosos formado por Manuel Olegario e Jaime Vilas, dous grandes mestres que fixeron vibrar o teatro.

Con todo, un dos momentos máis esperados da noite foi a presentación do grupo de acordeóns Abertal, nacido na propia escola, que interpretou temas do seu repertorio. Tocaron sós e tamén co grupo de percusión de Abertal e o coro, co que pechaban o festival. Un festival que normalmente Manuel Olegario, acordeonista autodidacta, compositor, profesor e membro de varias agrupacións, celebraba en terras pontevedresas e que este ano achegaba ata Valdeorras, onde este instrumento ten cada vez máis adeptos. “Esta foi unha forma de incentivar aos alumnos” explica o propio Manuel, pensando xa na segunda edición do Día Mundial do Acordeón na Rúa.

Fotos: Carlos G. Hervella.

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close