CulturaCulturaEducaciónÚltima hora

A Rúa acollerá un acto sobre a UNED para “amosar a Universidade aos municipios do oriente ourensán”

A cita será o vindeiro xoves 26 de setembro ás 20h. no Centro Cultural Avenida

Sede da UNED Valdeorras no colexio Manuel Respino da Rúa./ Foto: Mónica G. Bellver.

 

Co obxectivo de “dar a coñecer a Universidade Nacional de Educación a Distancia no oriente ourensán”, o vindeiro 26 de setembro chegará á Rúa o programa “Que é a UNED?” nun acto previsto para as 20h. no Centro Cultural Avenida.

Na sesión intervirá o representante da presidencia da Xunta Reitora da UNED en Ourense, Rosendo Fernández; o director do Centro Asociado á UNED en Ourense-Aula Universitaria da Rúa, Jesús Manuel García Díaz; o alcalde da Rúa, Álvaro Fernández López; e os egresados da UNED, Dominica Murias Borrajo e Diego González Álvarez, ambos graduados en Dereito. Tamén asistirá a secretaria do Centro Asociado, María Concepción Álvarez Gómez e foron convidados todos os alcaldes da zona así como os veciños e directores dos institutos.

Hoxendía, a estrutura da UNED en Ourense está formada por un Centro Asociado na capital, no que se atopa todo o aparato administrativo, educativo e de dirección; e a Aula da Rúa, onde se desenvolven titorías, ademais de celebrarse cursos de extensión universitaria, pero a súa orixe remóntase anos atrás na Rúa. Concretamente ao ano 1989, data do informe titulado Centro Asociado da UNED na Galicia Suroriental, promovido pola Asociación Cultural de Valdeorras.

 

Asistentes a un curso sobre técnicas de viticultura na UNED, na Rúa. /Foto cedida.

 

Tal como avanzan dende a propia Universidade, trala análise xeográfica e económica da zona “mencionábase ubicar o centro no colexio diocesano Pablo VI”. En dito documento incluíase como concellos para ese futuro centro os de Carballeda de Valdeorras, Castro Caldelas, Chandrexa, O Barco, O Bolo, Folgoso do Caurel, A Gudiña, A Mezquita, A Veiga, A Rúa, Larouco, Manzaneda, Monforte de Lemos, Petín, A Pobra de Trives, Proba de Brollón, Quiroga, Ribas de Sil, San Xoán de Río, Rubiá, Viana do Bolo, Vilamartín e Vilariño de Conso. Municipios que naquel momento sumaban 102.106 habitantes e dispoñían de 1.162 núcleos de poboación. “Aquel primeiro centro tivo como impulsor ao director do colexio, o sacerdote Zacarías Fernández Anta, que conseguiu os apoios necesarios para abrir as instalacións”. Naquel primeiro curso de 1990 rexistráronse 70 alumnos e quince anos despois, a UNED valdeorresa situouse no colexio Manuel Respino, onde se mantén. Aquel primeiro centro pasou a ser unha extensión do Centro Asociado á UNED en Ponferrada, ata que 1992 entrou en servizo o de Ourense.

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close