Máscaras, traxes de protección, guantes e productos desinfectantes son os materiais que o concello da Rúa recibía da Xunta de Galicia e do Goberno central para facer fronte ao Covid-19.
Con este material “cubrimos as necesidades do persoal en activo do Concello, servizos de asistencia a domicilio e persoal do Centro de Saúde”, explican dende o Concello, engadindo que o remanente “está a disposición de Protección Civil e a Policía Local, que fan entrega dese material de forma puntual naqueles casos nos que observan a saída ás rúas dos veciños que son consideradas persoas de risco no caso de contaxio”.
Estes equipos de protección súmanse aos que, en solidariedade con esta situación, están a elaborar moitos cidadáns de maneira altruísta. “Grazas a estas iniciativas privadas, tamén puido repartirse material en residencias de maiores e establecementos que proporcionan servizos esenciais de cara ao público”, aseguran dende o ente municipal.
Tamén para facer fronte á pandemia, leváronse a cabo por Medio Rural, labores de desinfección nas inmediacións das residencias de maiores, un colectivo especialmente vulnerable, así como test de Covid-19 a usuarios e traballadores das mesmas.
Fotos: Concello da Rúa