Cun último cuarto clave a selección española de baloncesto absoluta, que dirixe o seleccionador valdeorrés Lucas Mondelo, lograba o pase a cuartos de final na Copa do Mundo de baloncesto feminino, que se está a disputar en Tenerife. O equipo español, que se vía obrigado a xogar este partido tras caer onte por 72 a 63 ante Bélxica, comezaba perdendo na noite do 26 de setembro por un só punto no primeiro cuarto de xogo 17/18. Senegal saía á pista como un equipo agresivo e España non conseguía coller ritmo e perdía os rebotes.
Xa no segundo cuarto as xogadoras de Mondelo conseguían concluír o tempo de xogo empatando a 34 coas senegalesas e no terceiro cuarto comezaban a mudar as cousas e as españolas superaban no rebote a Senegal e movíanse con máis velocidade, ademais de mellorar na defensa. Aínda así, Senegal continuaba presionando e o cuarto remataba cun marcador de 46/40 favorable a España.
Xa no cuarto decisivo, o conxunto español comezaba a adiantarse no marcador cunha vantaxe de oito puntos, que logo iría a máis, chegando a estar, na nos últimos momentos en 63/45 e rematando o partido en 63/48. A vitoria custáballe á selección de Mondelo, pero finalmente chegaba. O seu rival en cuartos de final será Canadá.
