O obxectivo era a medalla e non renunciaban a el en ningún momento. A selección españa de baloncesto feminino enfrontábase por segunda vez na Copa do Mundo de baloncesto feminino a Bélxica na tarde do 30 de setembro. Pero desta volta non se repetía a vitoria belga. Se ben o equipo que dirixe o valdeorrés Lucas Mondelo non comezaba con bo pé o encontro, sabía reaccionar da mellor maneira, con moito carácter, empuxe, bos ataques, unha coidada defensa e traballando ben o rebote. Iso permitíalle limitar a capacidade de anotar das contrarias e remontar no marcador, concluíndo o primeiro tempo cunha lixeira vantaxe de cinco puntos sobre Bélxica (32/27).
No terceiro cuarto España mantiña esa dinámica, controlando o xogo e reforzando a defensa, o que lle permitía poñerse doce puntos por diante das belgas, a máxima vantaxe en todo o partido. Sen embargo, a situación daba un xiro no derradeiro cuarto. Bélxica reaccionaba atacando e anotando ata nove puntos seguidos fronte a ningún de España. Así, volvía o sufrimento ao equipo español, que finalmente lograba encontrar o camiño, daba unha lección en defensa mentres o público facía vibrar o Santiago Martín Arena de Tenerife e un espectacular triple de Xargay deixaba o marcador en 67/60.
Aínda non era segura a medalla de bronce, pero as xogadoras de Mondelo non a ían deixar escapar e anulaban a acción das belgas, recuperando o balón e impedindo calquera canastra mentres se esgotaba o tempo. Era entón cando explotaba a alegría española na pista e nas bancadas, nas que estaban varios familiares de Lucas Mondelo, quen nada máis rematar se dirixía a saudalos. Unha vez máis, este seleccionador valdeorrés sube a España a un podio mundial.
