O deporte náutico de alto nivel retorna ao Centro de Alto Rendemento de Laias, Arnoia e Castrelo de Miño (CERLAC). Actualmente, os integrantes da selección española xuvenil de remo están a desenvolver nas instalacións os seus adestramentos de cara ao campionato europeo de remo, que se celebrará o vindeiro mes de setembro en Belgrado. Trátase das seleccións masculina e femenina que abren o novo calendario de etapas no tempo da nova normalidade.
Á mañá deste sábado, 18 de xullo, o presidente da Deputación de Ourense, Manuel Baltar, acudiu ás instalacións para reunirse coa presidenta da Federación Española de Remo, Asunción Loriente, e analizar xunto cos deportistas as vantaxes do CERLAC. Na súa visita, Baltar analizou xunto con Loriente o calendario de adestramento e os plans, equipamentos e infraestruturas do centro coa intención de optimizar ao máximo os periodos de preparación.
Segundo Baltar, a acollida da selección xuvenil converte a Laias “nun dos centros máis importantes de España e de Europa en canto á preparación de competicións internacionais” e supón “situar ao CERLAC como capital do remo e do piragüismo”.
