Publicidade
CulturaCulturaÚltima hora

A serie “Hierro”, con produción executiva do petinés Alfonso Blanco, acada catro Premios Mestre Mateo

"O que arde" de Oliver Laxe era o filme máis recoñecido da gala con seis galardóns: mellor longametraxe, mellor dirección, dirección de arte, dirección de fotografía, montaxe e son

Os premiados nesta edición dos Mestre Mateo, ao final da gala./ Foto: Academia Galega do Audiovisual.

 

“Hierro”,  a serie de Portocabo, Movistar +, ArTe France e Atlantique Productions (con produción executiva do petinés Alfonso Blanco), continúa sumando recoñecementos. E, nesta ocasión, na casa. Na noite do sábado 7 de marzo tiña lugar no Pazo da Ópera da Coruña a gala dos Premios Mestre Mateo (presentada por Patricia Vázquez) nos que esta serie sumaba ata catro disticións: o premio a Mellor Serie de Televisión, ademais de Mellor Dirección de Produción para Ana Míguez, Mellor Guión para Pepe Coira, Fran Araújo, Araceli Gonda, Coral Cruz e Carlos Portela e Mellor Música Orixinal para as composicións de Elba Fernández e Xavi Font.

Especialmente galardoada resultaba ademais a terceira longametraxe de Oliver Laxe “O que arde”, que se impuxos en seis das doce categorías nas que optaba a premio: Mellor Longametraxe -Miramemira, 4A4, Kowalski Films e Tarántula- , Mellor Dirección para Oliver Laxe, Mellor Dirección de Arte para Samuel Lema e Curru Garabal, Mellor Dirección de Fotografía (Mauro Herce), Mellor Montaxe(Cristóbal Fernández) e Mellor Son (David Machado, Amanda Villavieja, Sergio Silva e Xavi Souto).

 

Oliver Laxe, con parte do equipo do filme “O que arde”./ Foto: Academia Galega do Audiovisual.

 

Por outra banda, “Quen a ferro mata”, que partía como favorita con quince candidaturas, lograba tres premios: o de Mellor Actor de Reparto para o lembrado Xan Cejudo, Mellor Actriz de Reparto para María Vázquez e Mellor Maquillaxe e Perruquería para Susana Veira e Beatriz Antelo.

Da adaptación para a pantalla do éxito teatral da compañía Chévere “Eroski-Paraíso” foron recoñecidos os seus intérpretes principais: Miguel de Lira e Patricia de Lorenzo, nas categorías de actor e actriz protagonista. Dous galardóns obtivo tamén “Segredos, desmontando Galicia”: o de Mellor Programa de Televisión e Mellor Realización para Marcos Barrios Carreira.

“Manoliño Nguema”, producido por Filmika Galaika, facíase co premio ao Mellor Documental mentres que “Antes de perder”, de RTVE e Cósmica Producións, ganaba o galardón á Mellor Serie Web. “16 de decembro”, dirixida por Álvaro Gago, conquistou o de Mellor Curtametraxe de Imaxe Real e “Homomaquia” de David Fidalgo Omil o de Mellor Curtametraxe de Animación. “Santiago cidade de cinema”, de Islandia Producciones, fixo o propio co de Mellor Anuncio e “Esquimales” (Heredeiros da Crus) de Xaime Miranda, co premio ao Mellor Videoclip.

O traballo de María Fandiño en “Lobos e Cordeiros” conseguía o premio á Mellor Vestiario, mentres que Lucía Regueiro obtivo o premio de Mellor Comunicadora polo seu traballo en Bamboleo. Ademais de premiar a excelencia dos profesionais e producións do ano, a Academia aproveita os Mestre Mateo para recoñecer a traxectoria de profesionais relevantes do audiovisual en Galicia co Premio de Honra Fernando Rey, que este ano foi para o proxeccionista do CGAI-Filmoteca de Galicia José María Rodríguez Armada, Chema.

 

 

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close